متعدد الاوجه
يناير 15th, 2008 بواسطة: Eng. Annoos |
يمكن هاد اكتر موضوع جدي بكتبه في مدونتي من ساعة ما نشرتها ع الويب يمكن السبب في هاد انو الواحد وصل معو حد انو خلص بكفي لازم الواحد يعبر شوي عن اللي جواه …
بدي اطرح التسائل التالي : ليش في كتير ناس عن جد ما بتحاول تفهم الواحد مين هو عن جد وتسيبها من القشور تبعته ؟ ليش في كتير ناس دايما بحكمو ع ناس تانيين وبأي وجه حق ؟ انا عارف والله انو اللي بقولو لحد الان عبارة عن شبه هلوسات وخرابيش لكن صبرك بالله يبني …
خليني ابدأ اكون واضح اكتر بكلامي , انا عن نفسي كل انسان في حياتي بعامله بطريقة مختلفه , طباعي بتكون مع كل انسان مختلفة عن اي انسان تاني حتى لهجتي مرار كتير بتختلف , يمكن واحد يقول طيب يا عمي ليش ما تكون واحد وتخلص من وجع الراس هاد ؟ وجوابي : انا هيك , انا شخصية معقدة وقليل ناس قليل جدا جدا جدا اللي بتفهم شو انا بدي بالزبط . ما علينا مش هان مربط الفرس بس حبيت ابدا بالمقدمة هاي لموضوعي اللي حابب احكي عنو …
انا عن جد نفسي اعرف لما انا بتغاضى عن اهانة انسان الي او حتى تلقيحه بالكلام علي , هل هاد البني ادم بفكر انو انا مثلا مش فاهم مغزى حديثه او مثلا انا متلجم ولساني اكلته البسه ومش عارف ارد او ايش بالزبط ؟؟؟ يعني يا سيدي هو عشان الواحد بقول كل الناس خير وبركة لازم يعني الناس هادي تستغل العبد لله وترمي كلام زي ما بدها , عارف يبني انك بتقول ايش بخبص الاهبل هاد بس ما علينا بلكي انا عرفت كيف بدي اوصلك ايش بدي …
خليني اتخصص كمان اكتر في مشكلتي اللي بحاول اوضحها , لما البني ادم بحاول يعطي صورة للبني ادمين اللي حواليه عن نفسه هل البني ادمين هدول بياخدو الصورة هادي مسلمة وبحاولوش يفهمو البني ادم هاد عن ويعرفو هل هو فعلا انسان كويس ولا خلص هاد البني ادم هيك هيك وهيو يا عمي هو معطينا صورة وفكره عن حالو انو هيك !!! اللي بدي اصله ليش احنا سطحيين لهادي الدرجة في التعرف على شخصيات البشر حوالينا وكمان بكرر وبقول ليش احنا بنحب نحكم ع البشر ؟؟؟
خليني اذكر هالموقف بلكي بساعد يوصل ع الفكرة الليي في بالي , هاد يا سيدي كنا قاعدين ” واحنا صغيريرن منعرفش حاجة يا بيه ” هههههههههه 5 فرفشة ميضرش هههههههههه المهم وين كنا اه تزكرت هاد يا سيدي قبل يومين كنا في قعدة شباب من الدفعة في بيت شب صاحبنا وبنحكي وبنلت وبنعجن وما خلينا حدا يعتب علينا الا حشينا فيه وفي سلسبيل سيرته الذاتية المهم على ذكر مواقف ندالة احد الشباب وفليكن X تمام وهالقيت الشب اللي بذكر المواقف وليكن Y بيحكي عنه - الشب X - وعن دواوينه المهم في شب تالت يشهد الله اني بحبه والجميع بحبه شب ذوق اخلاق ودود وكل الصفات المنيحة فيه وليكن Z تمام هالقيت , قبل ما اكمل العبد لله افرض انه A تمام , الشب Y بيقول: “والله انو X هاد خسيس ونذل وعمل هالفصل والموقف اللي زي الزفت مع الشب Z وما بنعمل معو هيك مواقف , يعني لو انعمل مع A كان الواحد ما زعل وقال عادي مهو A اروش ” !!! يا سبحان الله يا اخي !!! , ع فكرة الشب Y ما بعرف العبدلله A لله هالمعرفة القوية عشان يحكي هالكلمة , ممكن واحد يجي ويقول ” ياعم يمكن بمزح ” كهكهكه لا يا سيدي ما بمزح , يمكن يجي واحد تاني يقول ” يا عمو الحساس انت يختشي عليكي يختشي ” كهكهكه بقول هاد مثال ع مواقف كتير بتصبر مع العبد لله A لدرجة وصلت معو انو قرف من هيك , يمكن يجي واحد تالت اظرف من التنين الاوليين ويقول ” طيب مدامك اروش ايش يعني , مش يمكن تكون اروش عن جد ؟؟؟ ” هان انا بقول صف واطفي وتعال افهمك يخو …
هالقيت يا عيني ويا مهجة قلبي في عنا في الهندسة بروتكول محدد بين المهندسين انو المهندس هاد لازم يكون بني ادم ” وقور ” لابس هالببنطلون القماش ابو كسرتين ع جنب ع قميص سادة او كاروهات - ازا كان جاي من بيئة متحررة - , ولازم يحكي بطريقة معينة وتكون اهتماته بس كمبيوتر ومش مستعد يحكي الا عن الكمبيوتر والكتب و الجامعة والهوموركات يعني بالانجليزي GEEK , طيب ممكن تقولي وايش المانع ؟ برجع وبقول كل واحد والو شخصيته والكاركتر الخاص فيه , مش معناته انا مطول شعري او بلبس شارلستون او بحط انسيال في ايدي او بحب احكي بطريقة معينه او بحب اكون ساخر من كل اشي حوالي حتى من نفسي او يا سيدي لما اكون برا القاعة محكيش في العلم والكتب معناته انا واحد هلس او مش مستحق اني اكون مهندس نظرا لاني مش ماشي عالبروتوكول السخيف هاد اللي نفسي بس افهم مين حطه ؟؟؟ ع فكرة الكلام هاد بينطبق داخل الحرم الجامعي وخارجه في محيطك الاجتماعي كمان , اللي بدي اوصله التالي ” لا لبسنا ولا طريقة حكينا ولا اهتمامتنا هي اللي بتحدد مين احنا او مين نكون , اللي بحدد مين انت بس انت وقناعتك بذاتك بانك انسان كويس في صميمك ” هاي اول فكرة حبيت اوصلها في موضوعي …
الفكرة التانية يمكن انسب عنوان الها هو الابتزاز , في ناس بعرفش هل هم مرضى نفسيا او من شدة الغباء المركب اللي عندهم في اساليب تعاملهم مع البشر بعرفوش انو اللي قدامك بفهم كلامك وتلميحاتك مهما عمل حالو مش فاهم !!!؟؟؟ اقولك خليني اجيب موقف احسنلي عشان تستوعب ع السريع معي ايش اللي بدي اوصله , هاد يا سيدي في نفس القعدة المشؤومة واحنا بنطرنب مع نفس الشباب الرمة - انا مش عارف ليش مصاحبهم اصلا - هههههههههه بمزح يا شيخ والله انهم بركة ما علينا المهم انا بلعب انا وشريكي ضد تنين تانين , محور فكرتي التانية بتدور حول واحد من اللي بلعبو ضدي في اللعبة وليكن W تمام هاد الشب للامانة بني ادم كويس بس مشكلته حسب رأيي ان عجول ومدب في الحكي واحتمال كبير - حط 3 خطوط تحت كلمة احتمال - يكون معظم كلامه عن نيه كويسه بس بعرفش انو كلامه ممكن يسبب مشاكل عند ناس تانية ما علينا ارجع اكمل , هالقيت يا سيدي هاد الشب فاكر انو ايش الكل في الكل وبيؤمن جدا بنظرية المؤامرة عليه وانو احنا ضده في اي حاجة مهما كانت تافهه ومتكتلين عليه وبيفرض نية السوء لتصرف اي بني ادم قدامه توماتيك توماتيك , هالقيت الشب هاد شريكي في مشروع التخرج وهاد اللي معقد مشكلتي لانو انا ممكن اخلص من وجع هالراس كله وافض شراكتي معو بس بنفعش لسببين الاول انو مش منظر اروح للدكتور واقوله ” لا انا ياي مش مرتاح مع الشغل مع هالسوفاج هاد ” والسبب التاني والاهم في نظري انو الشب هاد وقف معي موقف كويس السنة الماضية وما رضي يسجل المشروع مع غيري مع انو كان ممكن ياخده ابدر عني ويخلص فهان هو مفضل علي بمعروف بيخليني اعجز اتصرف اي تصرف تاني لانو حيكون ندالة مني , هالقيت مربط القصة انو هالشب ما بخلي مناسبة الا بلقحله كلمة او كلمتين بقصد او عن غير قصد انو احنا معو تكملة عدد في المشروع وانو لولاه كل قصتنا فارطة من غيره وانو العمود المركزي واحنا حبة بهايم حواليه , هالقيت حوضحلك كيف انا وصلت للاستنتاج هاد بس صبرك علي , السؤال هو كيف هو وصل للقناعة هادي عن حاله ؟ الجواب : برجع وبقول شايف الفكرة الاولى اللي حكيت عنها انو الناس بتاخد فكرة عن البني ادم اللي قدامها بس من الصورة اللي بيعطيها اياهم بذاته من غير اي جهد منهم , هالقيت الشب هاد ماخد فكرة انو انا بني ادم لا يرتكن عليه ولا مبالي ومش شاطر كتير في البرمجة و عند اقرب مشكلة بصف وبطفي وببطل اعرف اتصرف وشغلات قريبة من هيك وهو مقنع حاله بالاشي هاد و ع اساسه بيتصرف مع العبد لله مع انو لو راجع حاله وراجع سجل شغلي معاه قبل هيك بعرف انا قديش ماهر في عملي وبتقنه لما احط راسي فيه بس رجائي يراجع نفسه بأمانة مشروع مشروع , هالقيت نرجع للطرنيب ينلعب يا سيدي وفي امان الله بحكيله انا في نص اللعبة ع اساس بكره نروح نشوف شغلنا في الجامعة الا بقولي ” مش انت قلت خلص بدك تشتغل المشروع لحالك ايش بدك مني ؟ ” وقالها باسلوب مزح مطعم بقصد تاني هو ” مصيرك ترجعلي وتعرف انك من غيري بتعرفش تعمل اشي ” برجع وبقول لما احط اشي براسي حعمله يعني حعمله وربنا كبير ” وربنا ع المفتري يا برعي ” يا ريت يكون بقرا في الموضوع هاد ويفهم انو كلامه هاد وتلميحاته اللي في كل مناسبة بتجرح واني ما برضى ارد عليه ليس خوفا من انو مثلا يحلق للشغل او اشي من هالقبيل لكن اللي بلجم لساني اني عارفه انو هو رح يفسر رد فعلي ع تلميحاته وتلقيحاته ضمن نظرية المؤامرة واني بكرهله الخير عشان هيك بمنع حالي اني ارد , وازكره بمين انا فعلا لانو مش من طبعي افتح دفاتر قديمة او انبش فيها , كل هدفي من هالفكرة التانية اصلاح الامور بيني وبينه لا اكتر ولا اقل لاني بعمري في حياتي ما ندمت ع اشي في حياتي وما بحب يكون هو اول ندم …
عارف ياللي بتقرا الموضوع بتقول ” يا شيخ خش في طيزي انت ومدونتك الله يلعن الساعة اللي بدخل فيها ع مدونتك مرة تانية انت واحسايسك المرهفة يا ننوسة ماما انا مالي ومال دواوينك ” ههههههههههه تشكر ياعم
الله يصلح بينكم يارب وروق يا عم انوس وبكرا تروق وتحلى
واهم شي في مدونتك تعليقك عليها ههههه
يسلموا …